Малларны уңышлы кышлату – коллективның бердәм хезмәт нәтиҗәсе

Ә хәзер сүз әлеге фермада кышлату эшләре барышы турында. Маллар җәйге лагерьдан вакытыннан алда күчерелгән, ләкин көндез аларны көтүлеккә чыгаралар.

- Фермада 24 кеше эшли, машина белән сыер саву операторлары дүртәү, алмаш савучылар да бар, - дип сөйли ферма мөдире. - Эш һәркемгә дә җитәрлек. Мәсәлән, бозаулар карау Михаил Афанасьев һәм Елизавета Ефремовага беркетелгән. Узган елның сентябреннән быелгы февральгә кадәр 162 бозау туды. Тәүге 15 көндә яңа туган бозауларны җылы бинада тотабыз, аннары секцияләргә күчерәбез.

Мал азыгы турында сүз чыккач, Николай Александров аның җитәрлек икәнен билгеләде. Көн саен һәр терлеккә егермешәр килограмм сенаж, бишәр килограмм печән, унар килограмм салам, дүртәр килограмм ашлык фуражы бирелә. Сенаж чокыры якында гына. Печән һәм саламны бераз читтәрәк өйгәннәр (янгын хәвефсезлеге таләпләренә ярашлы). Аларны ферма территориясенә ташу да авырлык тудырмый – ничә төргәк кирәк, шулкадәр китерәләр: бишәү икән - биш, унау икән – ун.

Мал азыгы тарату эше Алексей Щекинга тапшырылган, ул мал азыгы бутагычта эшли, Виталий Сосков һәм Илдар Мөхәммәтов төягечкә идарә итәләр.

Машина белән сыер саву операторлары Галина Усманова, Люция Мөхәммәтова, Анастасия Макарова, Илһам Вәлиуллин намуслы эшли.

Җаваплылыгы чикләнгән “Арслан” җәмгыятендә шулай ук атлар да бар. Аларны Родионовка фермасында тоталар. Аларны ат караучы Радик Гаврилов карый.

Бүгенге көндә хуҗалыкта сөт савып алу узган елдагыга караганда берникадәр югарырак, маллар тук, артым әйбәт, биналарда тәртип, болар барысы да коллективның бердәм хезмәт нәтиҗәсе. Айдарәле фермасында малларны кышлату уңышлы үтәчәгенә шик юк.