Мөгаллимлек юлы - аның бәхет юлы

Альфира Габил кызы инглиз һәм немец телләрен укыткан. Аның беркайчан да дисциплина ягыннан проблемалары булмаган, укучылар аның укыту ысулын яраткан. Чит тел дәресләре уен төрендә үткән: балалар рус әкиятләрендәге персонажлар белән диалоглар төзегән, уенчык самолетта анда яшәүчеләр өйрәнелә торган телләрдә аралашкан төрле илләргә сәяхәт иткән. Укытучы укытуның тагын бик күп башка инновацион ысулларын кулланган. Альфира Габил кызы һәр класста шук малайлар белән дә уртак тел таба белгән. Ул алардан дәресләр барышында класста тәртипне саклап торуларын сораган. Укытучының ышанычы аларга бүләк кебек булган. Шулай итеп, һәр дәрес күңелле һәм фәһемле үткән. Укытучы үз укучыларында уңышлы киләчәк күрә һәм аларны барлык башлангычларында да хуплый.

- Укучыларымның очраганда гаилә һәм хезмәт уңышлары белән уртаклашуына мин шатланам. Алар арасында сәнәгать, мәгариф, сәламәтлек саклау, авыл хуҗалыгы өлкәләрендә уңышлы эшләүчеләр күп. Укучыларым лаеклы кешеләр булдылар. Яхшы ата-ана, әйбәт хезмәткәр булу һәм намус белән яшәү өчен югары урыннар биләү мәҗбүри түгел, - дип сөйли Альфира Габил кызы.

... Мәктәпне тәмамлаганнан соң ул Башкортстан педагогия институтының инглиз-немец теле бүлегенә укырга керә. Чит телләргә сөюне аңа укытучысы Зөләйха Миргасыйм кызы Галиева сеңдерә, ул күпләр өчен нәфислек һәм матурлык үрнәге була. Хәер, ул елларда, хәзерге кебек үк, чит тел бүлегенә укырга керү алда зур офыклар ачкан. Чит телләр бүлегенә керү өчен катгый сайлау күпләрне куркыта. Ләкин унынчы класста укыган кызга уңыш елмая: Роза Анисимовна Сәйфетдинова ул вакытта 2 санлы мәктәптә завуч булып эшләгән була.

Роза Анисимовна, кызны кабинетына чакырып алып: «Мин синең укытучы булырга хыяллануыңны һәм филология факультетына барырга җыенуыңны беләм. Шулай ук инглиз теле дәресләрен яратуың да мәгълум. Мин сиңа чит телләр факультетына юллама буенча укырга керергә тәкъдим итәм» ди. Альфира дулкынланып: «Минем Уфада беркемем дә юк бит!» ди. Роза Анисимовна елмаеп: «Барысы да яхшы булыр. Ләкин җавапны хәзер үк бирергә тиешсең». «Әлбәттә, әйе!» - кыз кабинеттан Роза Анисимовна аңа бәхет кошы каурыен тоттыргандай килеп чыга. Әти-әнисе аңа 100 сум акча бирә. Бу акчага ул бер ай буе әзерлек курсларында яши, имтиханнар тапшыра, туганнарына күчтәнәчкә дә калдыра.

Институттан соң яшь укытучы Стәрлетамак шәһәренең 23 санлы мәктәбендә эшли башлый, өлкән укытучылардан тәҗрибә туплый. Ул инглиз һәм немец телләре дәресләре алып бара. Барысы да яхшы була. Эше үзенә ошый, коллективка да ияләшә. Ләкин аның күңеле урынында булмый: туган авылында аны мәхәббәте көтә. Александр Ермилов белән алар аның практикасы вакытында ук танышалар. Ул вакытта ул 107нче һөнәрчелек училищесында өлкән укытучы булып эшли. Соңыннан ачыкланганча, безнең районга Белорет районыннан егет очраклы гына килгән. Институттан соң Стәрлетамак районының ашлык совхозында практика узгач, ул шунда эшләргә калырга тели. Ләкин бу районда урын билгеләнеш исемлегендә ул булмый. Аның каравы, Стәрлетамак районы белән янәшә Стәрлебаш районы урнашкан. Язмыш үзенекен итә: ул безнең районны сайлый. Александрга бездә барысы да ошый: эш тә, кешеләр дә. Моннан китәргә уйлап та карамый. Төз буйлы, чибәр егет ахирәте белән профтехучилище курсантларына инглиз теле укыткан елмаеп торган, матур укытучы кызга гашыйк була. Кызлар мәктәптә практика үтә, һәм аларга практика вакытында училищеда эш тәкъдим итәләр. Альфирага да Александр ошый. Аз сүзле чибәр егетнең тәрбияле булуы, кешеләргә карата игелекле һәм ихтирамлы мөнәсәбәте кызны үзенә җәлеп итә. Алар арасындагы дуслык җитди мөнәсәбәтләргә әверелә. 1984 елда яшьләр матур туй ясыйлар. Ермиловның ике хуҗалы фатирда бүлмәсе була. Ул тәрәзә төбендә гөлләр үстерә. Ул өйләнгәнче алар ни өчендер чәчәк атмыйлар. Туйдан соң барлык гөлләр дә чәчәкләргә күмелә. Александр Иванович тормыш иптәшенә: «Минем тормышыма син килеп кергәч, гөлләр дә чәчәк атты, кадерлем», - ди.

- Мин ул чакта декабрист хатыны кебек идем. Тормыш иптәшемне партия кая җибәрсә, мин дә шунда булдым, - дип көлә Альфира Габил кызы. - Башта Кабакушта яшәдек. Бу авылда кешеләр игелекле һәм хезмәт сөючән, алар безне ачык йөз белән каршы алдылар. Беренче улыбыз Альберт шунда туды. Аннары Иске Калкаш авылына күчтек, ул безнең өчен икенче ватаныбызга әйләнде. Туганнар кебек булган дуслар таптык. Сашаны колхоз рәисе итеп билгеләделәр, ә мин шул авыл мәктәпләрендә укыттым. Монда безнең кызыбыз Альбина дөньяга килде. Җиде елдан соң район үзәгенә кайттык.

Мәгариф бүлеге җитәкчелеге Альфира Габил кызын Первомайский мәктәбенә укыту эшләре буенча завуч итеп җибәрә. Әмма ике бала үстергәндә күрше авылга көн саен эшкә йөрү җиңел булмый. Һәм ул тиздән башлангыч мәктәпкә урнаша. Бер үк вакытта район үзәгенең 1 санлы мәктәбендә дә дәресләр алып бара.

- Укытуымның 40 елы бер көн кебек үтте. Мин мәктәпне, укучыларымны бик сагынам. Минем начар укыган укучыларым гомумән булмады. Мин әле дә алар белән аралашам, уңышлары өчен шатланам. Алар арасында җитәкчеләр, начальниклар һәм директорлар шактый.

Ә гомумән, мин уңышлы кеше. Мин яхшы гаиләдә үстем, институтка җиңел генә кердем. Хәтта рус теленнән дә, рус әдәбиятыннан да имтихан вакытында мин бик яхшы белгән бер үк темага билетлар эләкте: Шолоховның «Поднятая целина»сы. Яраткан кешем белән матур гомер кичерәм. Балаларыбыз акыллы һәм ихтирамлы, хезмәт сөючән. Оныкларыбыз бию, спорт белән шөгыльләнә. Призлы урыннар ала. Без аларны бик яратабыз. Алар безне, без аларны хәстәрләп яшибез.

Гомумән, ул бәхет кошының каурые әле һаман да минем кулда икәнен тоям. Бәхет өчен кешегә тагын нәрсә кирәк?! - дип елмая РФ һәм БР хөкүмәт бүләкләре иясе Альфира Габил кызы Ермилова.

Хаклы ял кешегә диванда ятып телевизор карау өчен бирелми. Пенсиядә яңа тормыш башлана. Альфира Ермилованың яңа тормышы бик актив һәм кызыклы. Александр Ивановичның мавыгуы бар - ул умартачылык белән шөгыльләнә. Алар җәй буе табигатьтә үткәрәләр: Булаж авылы янында умарталык тоталар. Бу аларга ләззәт һәм күңел рәхәте бирә. Гаилә пары һәрвакыт янәшә, бер дулкында: бергә сәяхәт итәләр, тормыш авырлыкларын бергәләп җиңәләр, туганнары, дуслары белән актив аралашалар, җаваплы вазыйфалар биләүче балаларының уңышлары белән горурланалар.

Альфира Габил кызы 1 сентябрьдә туган. Аңа Аллаһы Тәгалә үзе укытучы булырга кушкандай. Белем көнендә ул туган көнен билгеләп үтә һәм якыннарыннан гына түгел, укучыларыннан да котлаулар кабул итә. Ул Роза Анисимовна Сәйфетдиновага һөнәргә юлламасы өчен, хезмәттәше Наилә Мәгафүр кызы Бәдретдиновага үзара аңлашулары өчен, гаиләсенә мәхәббәт һәм ярдәмнәре өчен, һәм, әлбәттә инде, барлык укучыларына киләсе буынны рухландырырга һәм укытырга мөмкинлек биргәннәре өчен рәхмәтле.

Укыту – ул патриотлыкның бер төре, диләр, чөнки укытучылар гомер буе үз йөрәкләренең бер өлешен укучыларына бирә. Бу нәкъ шулай!

Альфира Габил кызын һәм районыбызның барлык укытучыларын һөнәри бәйрәмнәре - Укытучылар көне белән котлыйбыз! Сабырлыгыгыз һәм ышанычыгыз өчен рәхмәт сезгә!

Зөлфия ГЫЙЗЗЕТДИНОВА.

Фото гаилә альбомыннан алынды.