Бүләккә – китаплар

- Китаплардан башка үземне күз алдыма да китерә алмыйм. Күптәннән һәм бик күп укыйм. Бер генә бит укымасам да, көнемне бушка узган дип саныйм. Кайда гына барсам да, китап сатып алмыйча кайтмыйм. Узган елда Иранда булдым, барыннан да ныграк мине һәр адым саен урнашкан китап кибетләре гаҗәпләндерде. Бездә китап укучы кешеләр азая баруы, китапларның бәясе артуы кызганыч. Шуңа күрә, китапны китапханәдән алып уку иң әйбәт вариант дип исәплим. Өйдәге китапларны 30 ел тирәсе җыям. Күптән түгел китапларымның бер өлешен китапханәгә бүләк итәргә уйладым, алар китап киштәсендә урын алып кына тормас, мотлак үз укучысын табар, дип ышанам, - ди ул.

Бүләк ителгән китаплар арасында – Фенимор Купер һәм Артур Конан Дойл маҗаралы әдәбиятларының тулы җыентыклары, “Яңа татар пьесасы” күп томлыгы, “Татар халык иҗаты” өч томлыгы һәм башкалар.

Минзәлә Нурулла кызы әйтүенчә, татар язучылары иҗаты аның күңеленә хуш килә.

Зөлфәт Хәким, Туфан Миңнуллин, Роберт Миңнуллин әсәрләрен укырга яратам. Август аенда миңа Роберт Миңнуллинның 70 яшьлек юбилеена багышланган иҗат кичәсендә катнашу бәхете тиде. Чара шагыйрьнең туган ягы Илеш районы Шәммәт авылында үтте. Аннан искиткеч тәэссоратлар һәм Роберт Мөгаллим улының автографы булган китап белән кайттым.

Шулай итеп, Минзәлә Фархшатованың өй китапханәсе тулылануын дәвам итә. Аның әйтүенчә, якын киләчәктә Карагыш китапханәсенә тагын берничә дистә китап бүләк итәргә ниятли.