Район хакимиятендә Башлыкта киңәшмәдә

Чираттагы оператив киңәшмә кичә, 16 гыйнварда үтте. Аны район хакимияте башлыгы Ф.З.Туктаров алып барды.
Башта Стәрлебаш авыл биләмәсе башлыгы Э.А.Денисов район үзәгендә эшләр торышы – урамнарда юлларны киңәйтү, кар түгү, түбәләрне кардан тазарту, Пролетар, Октябрьнең 50 еллыгы урамнарында авария сәбәпле суны ябу турында мәгълүмат бирде. Әлеге мәсьәләгә кагылып, Фәнүр Зөфәр улы чираттагы тапкыр гамәлдәге суүткәрү системасының бик иске булуы һәм таушалуы, шуңа күрә 2016 елда кайбер урамнарга яңа суүткәргеч сузылуы турында искә төшерде. Һәм суның сыйфаты биредә яхшырак – гамәлдәге суүткәрү системасына караганда суның катылыгы өч тапкырга кимрәк.
Яңа суүткәргеч төзелеше буенча эшләрне дәвам итү күздә тотыла. Әмма, кызганычка каршы, бу яңа системага халык та, шулай ук оешмалар, учреждениеләр, предприятиеләр тоташмый. 2017 елның июль уртасында иске суүткәргеч буенча су бирүне туктату турында карар кабул ителде. Шуңа күрә шушы вакытка кадәр барлык кулланучыларга яңа системага тоташу зарур. Моның белән бәйле, авыл биләмәләре хакимиятләре, тиешле хезмәтләр, оешмалар, учреждениеләр җитәкчеләренә әледән үк халык арасында аңлату, шулай ук әзерлек эшләре алып барырга кирәк.
Районда оператив хәл турында Русия Эчке эшләр министрлыгы Стәрлебаш районы буенча бүлеге полициянең участок вәкилләре бүлеге начальнигы Р.Р.Галиәкбәров мәгълүмат бирде. Үткән атнада дежур частена вакыйгалар һәм җинаятьләр турында 29 хәбәр килгән, шул исәптән – ришвәт бирү, кыйнау, спиртлы эчемлекләрне законсыз сату (20 литрдан артык тартып алынган), мондый продукцияне законсыз ташу, алдашу, автотранспортка исерек хәлдә идарә итү (кабаттан) турында берәр факт һ.б.
Стәрлетамак шәһәре, Стәрлетамак һәм Стәрлебаш районнары буенча күзәтү эшчәнлеге бүлеге начальнигы Ю.А.Бажин мәгълүматлары буенча, үткән атнада районда бер янгын теркәлгән – Яңа Калкаш авылында торак өй зыян күргән. Сәбәбе – мичне файдалану кагыйдәләрен бозу. Юрий Анатольевич төтен юлларын һәм ике катлы торак өйләрдә һәм шәхси секторда җилләтү каналларын вакытында тазарту (хезмәтләндерү) зарурлыгы турында искәртте. Бу үзегезнең, шулай ук якыннарыгызның, күршеләрегезнең хәвефсезлеге өчен кирәк.
РФ Пенсия фондының Стәрлебаш районы идарәсе начальнигы Л.М.Кәримова 2016 елда идарә эшчәнлеге турында җентекле сөйләде, анык, кызыклы саннар китерде. Бу турыда мәкалә гәзитнең киләсе саннарының берсендә биреләчәк.