+28 °С
Болытлы
Сәламәтлек саклау
21 октябрь 2019, 12:26
Мунча чирне "куамы"?
Көзге салкыннар башлангач, авыручылар саны да арта. Халык арасында: организмнан чирне куар өчен бераз алкоголь кулланырга кирәк, дигән фикерне еш ишеткән бар. Аннан тыш, кайберәүләр, тәннән салкынны куам, дип, мунча керергә ярата. Бу гамәлләр дөресме-түгелме, табиблар киңәшенә колак салып карыйк!
“Авырганда, иң беренче чиратта, организмның көчен мөмкин кадәр саклап калу өчен сәламәт яшәү рәвеше алып барырга кирәк, ә алкоголь сәламәт яшәү рәвешенә керми.
Әгәр кеше дарулар эчсә, аларның инструкциясендә спиртлы эчемлекләр белән бергә кабул итәргә ярыймы-юкмы икәнлеге язылган. Әлбәттә, хәмерне эчмәвең яхшы. Тик төрле хәлләр булырга мөмкин. Кунакка бару кебек очракларда башта дәвалаучы табиб белән киңәшләшегез”, — ди белгечләр.
Ә менә мунча керү температура булганда катгый тыела! Югыйсә, чир көчәергә генә мөмкин.
“Күз алдыгызга китерегез: температура югары булганда йөрәк тибеше 100гә җитә, сулыш алу да ешая. Мунчада мондый очракта кан басымы артык күтәреләчәк. Шулай булгач, мунчага барып, зыяннан тыш, бернинди дә файда алмаячаксыз”, — ди табиблар.
"Кызыл таң" гәзитеннән.
