Диабет җиңелә ул!

Куватов исемендәге Республика клиник дәва­ханәсе­нең эндокринология бүле­гендә 20 елга якын “Диабет мәк­тәбе” эшләп килә. Дәва­ха­нәдә 44 ел хезмәт салучы югары категорияле табиб, Баш­кортстанның атказанган табибы, сәламәт­лек саклау отличнигы, Лилияна Мажерина “Диабет мәктә­бе”ндә 18 ел авыруларга мөһим белем бирә. Пациентлар дәвалану алган чорда бу мәктәпкә йөреп, киләчәктә ничек яшәргә: дөрес туклану, физик күнегүләр, тормыш рәвеше хакында мәгъ­лүмат ала.

Благовар районының Кашкалаша авылында яшәүче Гүзәл Бикмәева 35 ел инде 1нче типтагы диабет диагнозы белән яши. Авыруны 24 яшендә ачыклаганнар. Гүзәл Әсрар кызының рух ныклыгына сокланырга мөмкин: ул коточкыч авыруга тарыдым, инвалидмын, дип сыгылып төшмәгән, үзен кулга алып, авыру килеш дөрес яшәргә өйрәнгән, 40 ел бухгалтер булып эшләгән. Республика дәваханәсенә ел саен килеп, сәламәтлеген ныгытып чыга, авыруны кон­трольдә тота, катлаулылыкларны кисәтергә тырыша.

– Шикәр диабеты – авыру түгел, ә тормыш рәвеше, дип саныйм, – ди ул. – Үз-үзеңне контрольдә тотарга, табиб кушканнарны үтәргә кирәк. Шул очракта тулыканлы тормыш белән яшәп була. “Диабет мәктәбе” дә миңа бик ярдәм итте.

Эндокринология бүлеге мөдире, Сәламәтлек саклау министр­лыгының штаттан тыш баш эндокринологы Полина Гусева авыруны башланганчы кисәтү мө­һимлеген ассызыклады. Моның өчен даими медицина тикшерүе үтәргә, кандагы шикәр дәрәҗәсен контрольдә тотарга кирәк. Аеруча нәселдә әлеге авыру очраклары булса. Артык авырлык, кан басымы күтәрелүне булдырмаска тырышырга кирәк­лекне дә әйтте табиб. Моңа, әлбәттә, дөрес туклану, физик күнегүләр һәм стресска каршы тору нәтиҗәсендә ирешелә.

1нче типтагы диабет яшь чакта ук ачыкланса, 2нче тип үзен еллар буе сиздермәскә, акрынлап үсешергә мөмкин. Аны башлангыч чорында ук ачыклап, күп катлаулылыкларны кисәтергә мөмкин. 45 яшьтән һәркемгә сәламәт­легенә аеруча игътибарлы булырга киңәш итте тәҗрибәле табиб.

Ләйсән Якупова.

"Кызыл таң" гәзитеннән.