Алинәбез — беренче!

Минск шәһәрендә фигуралы шуу буенча Европа чемпионатының беренче көнендә үк хатын-кызлар арасында кыска программада ярыш үтте. Безнең яраткан спортчыбыз, Олимпия чемпионы Алинә Заһитова анда, барлык осталыгын күрсәтеп, беренче урынга чыкты. Икенче урында — шулай ук, безнең спортчыбыз Софья Самодурова. Швейцария спортчысы Алексия Паганини әлегә өченче урында.

Иртәгә хатын-кызлар арасында ирекле программа буенча ярыш көтелә. Анда Алинә иң көчлеләр арасындагы соңгы разминкада — дүртенче, ә Софья бишенче булып чыгыш ясаячак. Ярыш лидерларына ирекле программаны да шулай төгәл һәм хатасыз башкарырга гына кирәк.

Илебез данын яклаучы кызларга уңышлар телибез!

"Кызыл таң" гәзитеннән.

Фото: Социаль челтәрләрдән.