Турнирның иң яхшы уенчысы - Әхмәдиев

Беренче чиратта уеннарның графигы төзелде, аларда уйнаучылар саны биш кешедән артмаска тиеш. Турнирга яңа елга кергәнче үк старт бирелгән иде. Бильярд өстәле артында ярышлар “Стәрле” спорт-сәламәтләндерү комплексында үтә. Спортның әлеге төрен яратучылар барлык Яңа ел каникуллары дәвамында ярышты. Ә күптән түгел иң яхшы уенчылар җиңүчене билгеләүче финал уенында көч сынашты. Шул рәвешле, Газинур Каюпов турнирның бронза призеры булды, “көмеш” – Рәис Хәйбуллинда, Әхмәт Әхмәдиев турнирның иң яхшы уенчысы дип табылды.
“Без үзара ярышып кына калмадык, вакытны бик яхшы үткәрдек, шаярдык, көлдек, рәхәтләнеп аралаштык”, - диде катнашучылар бүләкләү тантанасыннан соң.
ҮЗ ХӘБӘРЧЕБЕЗ. Фото Р.ЯРУЛЛИННАН алынды.