Матурлыклары һәм мөлаемлыклары белән таң калдырды

Быел аның финал турында 11 конкурсант катнашты. Сөйкемле, акыллы, талантлы кызлар тамашачыларга һәм жюри әгъзаларына үзләренең иң яхшы сыйфатларын күрсәтте. Аларның һәрберсе гүзәл һәм җиңүгә лаек. Алар “Визитка” конкурсында үзләре турында кызыклы итеп сөйләде, чыгышларын фото һәм видео слайдлар белән бизәде. “Минем героем” конкурсында хөрмәтле кешеләре турында сөйләү биремен уңышлы үтәделәр, купшы киемнәрдә чыгыш ясадылар. Аннары катнашучыларның берсе моңлы итеп җырлады, кемдер дәртле биеде, кайберләре кызыклы скетч күрсәтте. Монда аларга хезмәттәшләре, дуслары, хуплау төркеме ярдәм итте. Конкурсантлар җиңүгә омтылыш белән янып, сәхнәдә үзләрен иркен тотты. Һәм, әйтергә кирәк, лаеклы чыгыш ясады. Нәтиҗәдә, Гран-прига һәм “Стәрлебаш гүзәле” исеменә Алия Шәрипова (2 санлы Стәрлебаш урта мәктәбе) лаек булды. Вилена Мөрәсева (Хәлекәй авыл биләмәсе) беренче урынны, Ләйлә Күчәрбаева (Иске Калкаш авыл биләмәсе) икенче урынны, Гөлфия Назарова (Яңгырчы авыл биләмәсе) өченче урынны алды (рәсемдә). Башка кызлар төрле номинацияләрдә: Розана Галиева (Куганакбаш авыл биләмәсе) – “Сәнгатьле сүз остасы”, Алсу Сөярембәтова (Кабакуш авыл биләмәсе) – “Мисс креативлык”, Рузилә Мостафина (Бузат авыл биләмәсе) – “Мисс-сылукай”, Эльвина Бурдикова (Иске Калкаш авыл биләмәсе) – “Нәзакәтлелек”, Валентина Дьячкова (Стәрлетамак тармакара колледжы Стәрлебаш филиалы) – “Бизнес-леди”, Диана Халитова (Аллагуат авыл биләмәсе) – “Нәфислек”, Юлия Саляева (1 санлы Стәрлебаш урта мәктәбе) – “Гүзәллек” номинацияләрендә бүләкләнде һәм Интернет тавыш бирү җиңүчесе булды.

Яшьлекләре, сылулыклары һәм матурлыклары белән конкурста катнашучылар тамашачыларның күңеленә хуш килде. Ә хосусый эшкуар Гүзәл Арсланованың “Чәчәкләр һәм бүләкләр иле” остаханәсеннән матур чәчәк бәйләмнәре кызларны шатландырды. Беркем дә бүләксез китмәде. Бәйрәм бик матур булды.