Гүзәллек, чәм, хәрәкәт һәм күтәренке кәеф бәйрәме

Катнашучылар өчен төрле сынаулар әзерләнде: урыннан озынлыкка сикерү, идәнгә ятып кулларда этеп күтәрелү, пневматик винтовкадан ату, йөзү. Ярышлар кызларны үзләренең физик әзерлеге турында уйланырга мәҗбүр итте. Кулларда этеп күтәрелү иң катлаулы сынауларның берсе булды. Катнашучыларга гәүдәләре белән махсус җайланмага кагылырга кирәк иде. Аңарда булган лампочка кагылганда гына яна, ә ул янмаса – нәтиҗә саналмый. Кайбер гүзәл зат вәкилләре бу көнне винтовканы беренче тапкыр кулларына тотты. Коралны кулларына алу белән алар чәмләнеп мишеньга тидерергә тырышты. Кайберләре ярыйсы ук әйбәт уңышка иреште.

Фестиваль турында катнашучыларның барысы да бертөрле фикердә: “Эш һәм өй мәшәкатьләреннән ял иттек, спорт егәрлеге алдык, үзебезнең мөмкинлекләрне сынадык”, - диделәр алар. “Бердәм Русия” партиясенең урындагы бүлеге оештырган чәй табыны артында хатын-кызлар алдагы ял көннәренә планнары белән уртаклашты. Чарада җиңүчеләр һәм призерлар Грамоталар һәм истәлекле призлар белән бүләкләнде.