Кышны озатабыз - язны каршылыйбыз

Балалар иҗат йорты мәйданында үткән бәйрәмдә балалар берләшмәләренең педагоглары һәм тәрбияләнүчеләре, шулай ук коймак исен сизгән һәм уйнарга, күңел ачарга теләгән бөтен кеше катнашты. Дәртле музыка бәйрәм мохите тудырды, ә балаларның күңелле шау-шуы тагы да күбрәк сөенеч һәм шатлык өстәде. Күңелле шамакайлар, Масленица, Кыш, Яз-сылу һәркемнең күңелен күтәрде. Балалар зур канәгатьлек белән әйлән-бәйлән уйнады, “Аркан тартышу”, “Кашыкка йомырка салып йөгерү”, “Чана шуу” (рәсемдә) конкурсларында катнаштылар, табышмакларга җаваплар таптылар.

Бәйрәмдә катнашкан һәркем рус халкының чагу бәйрәмнәренең берсе – кышны озату бәйрәмендә булып, рух күтәренкелеге алды. Аннары балалар самавырда кайнаган чәй һәм тәмле коймаклар белән сыйланды.