Куллары белән могҗиза тудыра

Үз вакытында киночелтәр коллективына җитәкчелек иткән Наилә Абдулла кызы Галләмова 1954 елның октябрендә Стәрлебаш авылында киночелтәр хезмәткәрләре гаиләсендә туган.

Аның әтисе Абдулла Бәхтияр улы Шакиров гомерен шушы тармакта эшләүгә багышлаган. 15 яшендә ул киночелтәргә моторист ярдәмчесе булып урнашкан, аннары киномеханик һәм мастер булган. 62 яшендә техник җитәкче вазыйфасында хаклы ялга чыккан. Әнисе Хәлимә Минеәхмәт кызы 18 ел гомерен балалар бакчасында эшләүгә багышлый. Намуслы һәм фидакарь хезмәте өчен «В.И.Ленинның тууына 100 ел тулуга карата” юбилей медале белән бүләкләнә. Аннары киночелтәргә эшкә керә һәм 55 яшенә кадәр шунда эшли.

Н.Галләмова Стәрлебашта укый. Мәктәпне тәмамлаганнан соң Чакмагыш кооператив техникумына укырга керә, әмма ике атна укыганнан соң аның үзенә ошамаганлыгын аңлый. Стәрлебашка кайта һәм балалар бакчасына тәрбияче ярдәмчесе булып эшкә бара, аннары тәрбияче була. Анда ике ел эшләгәннән соң 1974 елда Дондагы Ростовта кино техникумының читтән торып уку бүлегенә керә. Шул ук елда район киночелтәрендә кассир булып эшли башлый. Аннары ул шушы өлкәдә барлык баскычларны үтә – методист, фильм тикшерүче, КИПиА слесаре, фильм склады мөдире була. 1990 елда аны киночелтәр директоры урынбасары, ә 1995 елда директор итеп тәгаенлиләр. 2008 ел ахырында учреждение ябыла, ә Наилә Абдулла кызы вакытыннан алда хаклы ялга чыга.

Ул 30 елдан артык сайлау өлкәсендә дә эшли – участок сайлау комиссиясе рәисе, территориаль сайлау комиссиясе рәисе урынбасары була. Монда аның турында бик җаваплы, итагатьле, мөлаем ханым буларак фикер туа.

Аның гаиләсе бик тату. Тормыш иптәше Рәшит белән ике ул тәрбияләп үстергәннәр, аларга югары белем алырга ярдәм иткәннәр. Хәзер аларның һәркайсының үз гаиләсе, үз тормышы. Ә картәти белән картәниләре алты оныкларын тәрбияләргә ярдәм итәләр.

Йорт мәшәкатьләреннән бушаган арада ул коллаж белән шөгыльләнә. Сәнгатькә һәм рәсемгә кызыксыну мәктәп елларында ук башлана. Республика конкурсларында катнаша, дүртенче класста хәтта Уфа сәнгать мәктәпләренең берсенә укырга керә, ләкин картәтисе белән картәнисе аны үз яннарыннан җибәрәсе килми. Бүгенге көндә Н.Галләмованың эшләре район Мәдәният йорты фойесында Стәрлебаш районы кул эше осталары күргәзмәсенә куелган.

Вакыт үтә, Стәрлебаш үсешә. Хәзер һәр өйдә телевизорда йөзләгән каналда һәм Интернетта бихисап фильмнар карарга мөмкин. Ләкин безнең илдә кинога сөю югалмый, ул янә кешеләрнең күңеленә әйләнеп кайта. Кешеләр янә зур экранда фильмнар карарга тели. Арабызда төрле шөгыльләр белән мавыккан кешеләрнең күп булуы сөендерә. Хуҗалыкта, өйдә мәшәкатьләрнең күп булуына карамастан, алар өйләрен бизәп тору белән бергә күңелләрне сөендерүче күркәм әйберләр иҗат итә. Алар арасында иҗади шәхес – Наилә Галләмова да бар.

Гөлдәр ГАФИЕВА. А.ЗӘЙНЕТДИНОВ фотосы.