Менә шундый кул осталары!

Быел яз район Мәдәният йортында декоратив кул эшләре иҗаты галереясе төзелде, анда күп кенә осталар үз эшләрен тәкъдим итте. Күргәзмәне мамык шәл осталары халык клубы һәм “Алтын куллар” декоратив кул эшләре иҗаты клубы җитәкчесе Зөлфия Вапаева оештырды. Берләшмә эшендә соңгы вакытта активлык күзәтелә. Оста куллы ханымнар бергә җыелып, үзләренең яңа эшләрен күрсәтә, осталык дәресләре үткәрә, үзләренең кул эшләре осталыгы серләре белән уртаклаша.

- Галереягә һәр кеше үз эшләрен китерә ала. Күпләр нигәдер аларны халыкка күрсәтергә батырчылык итми. Ә бит монда аларның эшләрен күпләр күрә, бәлки теге яки бу әйберне сатып алырга теләүчеләр табылыр иде, - ди Зөлфия Тимергали кызы.

Хәзерге вакытта күргәзмәдә Наилә Галләмованың комнан, вак ташлардан, кабырчыклардан ясалган искиткеч рельеф картиналары куелган. Карап торуга гадәти әйберләр, ә нинди матур һәм кызыклы картиналар килеп чыккан!

Гүзәлия Әхмәтова борынгы милли баш киемнәренә – түбәтәйләргә һәм калфакларга матурлык өстәү белән мавыга. Төгәлрәге, аларны чәчәкләр, атлас, тасмалар, төймәләр белән бизи. Аның уйлап табу осталыгына чикләр юк. Останың эшләре дә бирегә куелган.

Тагын бер оста куллы хатын-кыз – район үзәгеннән Зөлфия Идрисова. Зөлфия Зыя кызы үзенең мавыгуы – тукыма кисәкләреннән тегүгә иҗади һәм зәвыклы якын килә. Бу техника элеккечә бик күп ачык төстәге тукымаларны җыеп, үзара тегүдән гыйбарәт. Галереядә оста кулның кайбер эшләре – юрганнары, кухня өчен тоткычлар белән танышырга мөмкин. Быел ул “Русиянең тукыма картасы” Бөтенрусия квилт-проектында катнашып, үзенең үзенчәлекле эшен – тукыма кисәкләреннән тегеп, республиканың моделен тәкъдим иткән. Искиткеч матур килеп чыккан! Башкача булуы да мөмкин түгел – чөнки ул иҗатына бар күңелен сала.

Әлфия Ильясованың барлык мавыгулары турында сөйләп бетерүе кыен. Шуларның берсе – амигуруми – энәләр һәм ыргак белән йомшак уенчыклар һәм курчаклар бәйләү. Алар бик чагу һәм кызыклы килеп чыга. Мондый матуркайлар беркемне дә битараф калдырмый. Һәркайсы өлкәннәр һәм балалар өчен менә дигән бүләк. Соңгы вакытта ул киез басу белән шөгыльләнә башлаган. Үз куллары белән йоннан беретлар, башлыклар, өйдә кию өчен аяк киемнәре кебек уникаль әйберләр тудыра. Кыскасы, Әлфия Тимерхан кызы – кул эше остасы.

Альбина Гарифуллина – оста куллы ханым һәм өч бала әнисе. Ул яңа төр кул эше – сәйлән белән үрү белән шөгыльләнә башлаган. Бу сәнгать никадәр түземлек, күнекмәләр, иң мөһиме теләк таләп итә. Сәйләннәрдән искиткеч матур композицияләр барлыкка килә. Аларның матурлыгын сүзләр белән генә аңлатып бетерү мөмкин түгел, үз күзләрең белән күрергә кирәк.

Фәнилә Юлдашева – элекке бухгалтер. Пенсиягә чыккач, алмаз белән чигү эшенә мавыккан. Ул энә һәм җепләрдән башка, төсле стразалар ярдәмендә картиналар тудырудан гыйбарәт. Алар булачак картинаның махсус схемасына ябештерелә. Һәм нәтиҗәдә шундый матур полотно килеп чыга. Миләүшә Сабитова һәм Лилия Тимербаева келәм чигү осталыгы турында барысын да белә (моңардан тыш Лилия Мөдәрис кызы бәйләү белән дә мавыга).

Шәл бәйләү осталарыбыз турында бик күп соклану сүзләре әйтергә мөмкин. Аларның эшләре төрле күргәзмәләрдә, конкурсларда югары бәя ала, сорау белән файдалана. “Стәрлебаш бизәкләре” мамык шәл осталары клубына килүчеләрнең иң өлкәне Зәйнәп Таҗетдиновага 80 яшь, әмма өлкән яшьтә булуына карамастан, ул матур шәлләр бәйләвен дәвам итә. Аның мавыгу буенча коллегалары Сәрия Рысаева, Сәрия Галимова, Зөлфирә Рысаева – яраткан эшләренә – бизәкле шәлләр, косынкалар, палантиннар бәйләүгә күп елларын багышлады. Хәзерге вакытта алдагы ике республика чарасына – мамык шәл бәйрәме һәм “Уфа-Ладья. Арт. Кәсепләр. Сувенирлар” күргәзмәсенә әзерлек бара.

- Безнең берләшмәгә килергә, үзенең иҗат җимешләрен күрсәтергә, идеяләре, уйлап табу осталыгы белән уртаклашырга теләүчеләрнең һәрберсенә шатбыз. Тирә-ягыбызда талантлы кешеләр бик күп. Кыюрак булыгыз! Сезнең иҗатыгыз сезне һәм якыннарыгызны гына түгел, тирә-юньдәгеләрне дә сокландырсын. Халык декоратив кул эшләре иҗаты галереясе тиздән яңа эшләр белән тулыланыр дип телисе килә, - диде әңгәмәбез ахырында Зөлфия Вапаева.

Иҗат итегез, иҗатыгыз белән башкаларны сөендерегез, кадерле кул осталары!

Фаягөл ЙОСЫПОВА. А.ЗӘЙНЕТДИНОВ фотолары.