Барлык яңалыклар

Балалар белән рәхәтләнеп эшлим, ди Әлфия Шәрипова

Балачагында ул педиатр булып, балаларны дәваларга хыяллана. Ә соңыннан педагогия югары уку йортын сайлый һәм утыз елдан артык балаларга башкорт теле һәм әдәбиятыннан белем бирә. Үзе теләгәнчә, балалар белән эшли, аларның күңелендә мәрхәмәтлек, изгелек һәм гүзәллек тәрбияли. Сүз Елембәт урта мәктәбенең югары категорияле укытучысы Әлфия Шәрипова турында.

Башкача булуы да мөмкин булмагандыр, чөнки Әлфия балачактан җырларга, биергә һәм укырга яраткан. Аларның Миякә районындагы Богдан авылында китап фонды бик бай була. Үз эше белән мавыккан китапханәче төрле конкурслар да оештыра. Әлфия аларда еш кына җиңүче була, шул исәптән күп тапкырлар иң күп китап укучы исеменә лаек була.

Мәктәпне тәмамлагач, алты балалы ишле гаиләдә тәрбияләнгән кыз, ике ел Сәфәр авылында сәнгать җитәкчесе булып эшли.

- Эшләве бик кызыклы, миңа ошый иде. Ләкин бервакыт, гәзиттә Стәрлетамак педагогия институтына укырга җыюлары турында игъланны күреп, укырга һәм балаларга белем бирергә теләвемне аңладым. Минем ике апам да ул вакытка педагог һөнәрен сайлаган иде, - ди ул.

Укуы бик кызыклы була. Югары һөнәрмән укытучылар белем биргәнлектән, аларны укыткан профессорлык составы бик көчле була. Стәрлетамак дәүләт педагогия институтында үзе яраткан һөнәрне алу белән бергә, тормыш юлдашын да очрата. Дүртенче курста танышып һәм ике елдан соң Елембәт егете Наил Шәрипов белән язмышларын бәйләп, алар өч дистә елдан артыграк тормыш юлыннан бергә баралар. Бер үк вакытта алар ир белән хатын, бер максатлы кешеләр, коллегалар. Наил Касыйм улы да Стәрлетамак дәүләт педагогия институтында белем алган, хәзер – Елембәт урта мәктәбе директоры.

- Балалар белән эшләү – шатлык, - дип саный Әлфия Өметкол кызы. – Авыл балалары тырыш, зирәк, тапкыр, кызыксынучан, ихтирамлы. Мәктәптә яхшы укыйлар, өйдә ярдәм итәләр, шигырьләр язалар, җырлыйлар, бииләр.

Һәм ул озын исемлекне – район һәм республика фәннәр олимпиадалары һәм иҗади конкурслар җиңүчеләренең һәм призерларының исемнәрен санап китә. Аларны санап китсәң, ике бит тулыр иде. Үрнәк алырлык кешеләре дә бар шул. Мәктәпнең бөтен коллективы, шул исәптән Әлфия Өметкол кызы, “Баек” абруйлы республика телевизион конкурсында җиңүче “Ахирәтләр” халык фольклор ансамбленә йөриләр. Шулай ук безнең героебыз – күп кенә республика, район, фәнни-гамәли конференцияләрдә һәм авыл биләмәсе тормышында актив катнаша. 9 класс укучыларының яраткан укытучысы. Ачык күңелле, бәхәсле мәсьәләләрне тыңлый һәм гадел хәл итә белгән, укучыларының тормышы һәм мавыгулары белән даими кызыксынган, һәркайсында шәхес тәрбияләү өчен шартлар тудыручы, әти-әниләр белән тыгыз бәйләнештә торган педагог ул.

- Вакытның тиз үтүе генә кызганыч. Елларның җитез аргамактай үтеп китүе сизелмәде дә, әмма аларда матур мизгелләр бик күп, - ди ул.

Ә бу укытучының үз фәне белән мавыгуы, аның балаларга, тормышка сөюе турында сөйли. Әлфия Өметкол кызы төрле-төрле чәчәкләр дә үстерергә ярата. Алар Шәриповларның өен һәм бакчасын бизи.

Балалар – тормыш чәчәкләре, дибез. Елембәт урта мәктәбе укытучысы Әлфия Шәрипова 30 елдан артык аларга белем һәм тормышка юнәлеш бирә. Һәм ул моның белән бәхетле.

Рәйсә МУСИНА. Фото гаилә альбомыннан алынды.

Читайте нас в