Матур гаилә - бәхет нигезе

Русиядә авыл хуҗалыгы авыр вакытлар кичергән шартларда да гаиләсен туендырырга һәм шәхси тормыш дәрәҗәсен лаеклы югарылыкка күтәрергә сәләтле кешеләр бар. Сүз Земфира Галиян кызы һәм Марат Мансаф улы Булатовларның ныклы, тату гаиләсе турында барачак, алар якташларына кул кушырып түгел, ә хезмәт белән яшәү үрнәге күрсәтә. Әлеге гаиләдәге эшсөючәнлек нәселдән килә. Бәлки шуңадыр, авыр крестьян хезмәте аларны куркытмый: алар фермерлык белән шөгыльләнергә карар итә.

Марат Мансаф улы бар нәрсәне дә үз куллары белән эшли. Ул машина йөртүче дә, тракторчы да, комбайнчы да, механик та. Теләсә кайсы техниканы үзләштерә һәм ремонтлый. Фермерлык эшенең җиңел түгеллеге һәркемгә мәгълүм. Иртә таңнан төнгә кадәр эшләргә кирәк, күбесенчә ялларсыз һәм бәйрәм көннәрсез. Үзен әлеге һөнәргә багышлаган кеше икътисадчы да, хисапчы да булырга тиеш. Бу яклап Марат Мансаф улына аның тормыш иптәше ярдәм итә.

Земфира Галиян кызы яхшы хуҗабикә, өендә уңайлык һәм матурлык булдыра белә. Аның тагын бер мавыгуы бар – ул чәчәкләр үстерергә ярата. Аларның өе яныннан узып баручыларның игътибарын нәкъ алар җәлеп итә. Булатовларның шәхси хуҗалыгы да бәләкәй түгел: сыерлар, үгезләр, казлар, үрдәкләр, тавыклар. Аларны карау күп вакытны алса да, нәтиҗә аңа торырлык. Ит, сөт, эремчек, каймак, йомырка – барысы да үзләренеке. Моңа өстәп, үз бакчаларында яшелчә-җимешләр дә үстерәләр. Гаилә бюджеты өчен бик яхшы табыш була.

Гаилә иркен йортта яши, анда уңайлы яшәү өчен барлык шартлар да булдырылган. Өй хуҗасы йортның һәр почмагын матурлаган, анда тәртип һәм пөхтәлек, барлык бүлмәләрдә ямь бөркеп тора, уңган хатын-кыз кулы сизелә. Җитеш тормышта гына мондый күркәмлекне тудырырга мөмкин. Болар артында гаилә парының ныкышмалы хезмәте тора, һәм алар ирешелгәннәрдә тукталырга уйламый.

Һәр ата-ана өчен бала иң мөһиме. Булатовлар өчен дә балалары – кояш нурлары. Зилия яхшы билгеләре белән шатландыра, Юлай – биюдә уңышлары белән, ә өлкән уллары Урал әтисенең төп ярдәмчесе. Ул Стәрлетамак шәһәрендә төзелеш колледжында укый. Әти-әниләре балаларының уңыш чыганагы – яхшы уку һәм хезмәт дип исәпли.

Булатовлар гаиләсе халыкка, балалар бакчасына һәм мәктәпкә даими хәйрия ярдәме күрсәтә. Әйткәндәй, алар ярдәме белән күптән түгел үткән Яңа ел бәйрәмнәрендә мәктәп чыршысы чагу төсләр белән балкыган, ә укучылар тәмле призлар алган. Мәктәп администрациясе, укытучылар, ата-аналар һәм укучылар аларга моның өчен рәхмәтле һәм киләчәктә уңышлар, сәламәтлек һәм барлык хыялларының тормышка ашуын тели.

Һәркем үз юлын үзе сайлый. Булатовлар да үз юлын тапкан. Алар аның буйлап ныклы адымнар белән бара, куелган максатларына ирешә, көндәлек җиңел булмаган хезмәтләре белән хыялларына якынлаша.

Фото гаилә альбомыннан алынды.