Бар булмышы белән укытучы

Ул Зианчура районыннан. Әти-әнисе – “Инәк” совхозы эшчәннәре, үзләренең балаларын туган җиргә һәм туган телгә сөю рухында тәрбияләгәннәр. Барысына да югары белем алырга ярдәм иткәннәр. Биш баланың өчесе педагогия югары уку йортын сайлаган. Гаиләдә дүртенче бала булган Гөлнара 8 класста укыганда ук укытучы булуына ныклы ышана. Бу һөнәр ул елларда модада булган өчен түгел, ә йөрәге кушуы буенча укытучы булырга тели ул. Зифа нәфис буйлы, зур коңгырт күзле, зирәк кыз тарихны, телләрне һәм әдәбиятны мавыгып үзләштерә. Мәктәптән соң ул Салават педагогия училищесына керә. Яшь башлангыч класслар укытучысын туган авылы мәктәбенең коллективы шатланып кабул итә. Яраткан укытучылары кызга һөнәрнең барлык нечкәлекләрен өйрәтә. Туган җирендә булуы да ярдәм итә аңа. Дәресләрдән соң ул әдәби кичәләр оештыра. Балалар белән Галиәсгәр Камалның “Беренче театр” спектаклен куя, концертлар оештыра. Авыл клубларында гына түгел, сөтчелек фермаларының кызыл почмакларында да чыгыш ясыйлар, аларны савучылар һәм мал караучылар алкышлар белән озата. Гөлнара әле яхшы агитатор да була. Аның хәтерендә бу еллар гомере буена озын һәм уңышлы хезмәт эшчәнлегенең якты һәм онытылгысыз чоры булып кала. Тиздән Салават педучилищесы директоры Нәҗип Гафур улы Ярышев элекке укучысына аларның юнәлеше буенча укуын дәвам итәргә башкалага Герцен исемендәге МДПУга барырга тәкъдим итә. Күпләр аның урынында булырга теләрләр иде, әмма төптән фикер йөртүчән Гөлнара аның бу заманча тәкъдименнән баш тарта. Чөнки ул бу вакытта инде БДУның тарих факультетында читтән торып укый. Аңа анда уку бик охшый. Кызның менә шундый актив, шул ук вакытта гадәтләнгән, тулысынча яраткан һөнәренә багышланган тормышына аның абыйсының тәкъдиме килеп керә. Районның элекке прокуроры, Рәүф Гыйбадулла улы Дәминев, мәгърифәтле район үзәгендә эшләргә кызыклырак булыр дип, ул елларда сеңелесен үзләренә чакыра. Туган мәктәбендә биш ел укытучы булып эшләгәннән соң Гөлнара Стәрлебаш районына күчеп килә. Район мәгариф бүлеге җитәкчелеге аны башта Корнеевка авылының башлангыч мәктәбенә эшкә тәгаенли, артабан Первомайский урта мәктәбенә завуч итеп куя. Монда, Амур Абсатаров белән гаилә корып, Гөлнара шәхси бәхетен дә таба. Эшлекле һәм зирәк кызның “Гаилә әгъзалары һәрвакыт өйгә шатланып кайтсын өчен ул уңайлы булырга тиеш!” дигән принцибы үз нәтиҗәсен бирә. Бүгенге көндә Абсатаровларның гаиләсе тату, ныклы, бәхетле. Ике ул тәрбияләп үстерәләр. Гөлнара аларга әтиләренең йөзен кызартмаска тиешлекне аңлатып үстерә. Олы уллары Тимур – УДАТУ 3 курс студенты, кечеләре Илнур Стәрлетамак тармакара колледжында укый. Тормыштагы барлык сынауларны алар бергә иңне-иңгә куеп үтә.

- Безгә улларыбызның берсе белән еш кына дәваханәләргә, шифаханәләргә йөрергә туры килде, тормыш иптәшем хуҗалыктагы барлык мәшәкатьне һәм бала карауны үз өстенә алып кала иде. Ул миңа эштә дә, тормышта зур таяныч. Һөнәремне бик яратам. Тарих буенча репетиторлык белән шөгыльләнәм. Бу эштән соңгы барлык вакытны ала. Даими рәвештә камилләшергә, укырга, ә кайвакыт әдәбиятны кабат-кабат укырга туры килә. Үзеңә никадәр күбрәк белем сеңдерсәң, балаларга да шулкадәрне үк бирәсең. Тарихны һәркем белергә тиеш дип уйлыйм. Бу фикерне укучыларыма да җиткерәм, - ди Гөлнара Урал кызы.

- Грамоталы белгеч. Әйбәт укытучы! – ди аның турында Первомайский урта мәктәбе директоры Фидан Фәргать улы Усманов. Бу сүзләр – республиканың Мәгариф министрлыгының Почет грамотасына, район мәгариф бүлегенең Почет грамоталарына һәм Рәхмәт хатларына ия булган “Ел укытучысы-2017” район конкурсы җиңүчесе өчен иң югары бәя.