Акмулланың гыйлем арбасын бүген кем тарта?

Стәрлебашның заманында 40 мәдрәсәсе булган алтын чоры бүген дә тарихтан җуелмаган, чөнки борынгыдан салынган мәгърифәт юлыннан бүген­ге мәгърифәтчеләр, зыялылар атлый. Менә инде 25нче ел Стәрлебаш районында Мифтахетдин Акмулла исемендәге әдәбият­ны һәм мәдәниятне үстерү фонды үзенең премиясен тапшыру чарасын зур тантана итеп оештыра. Шушы вакыт арасында 18 шәхес (әдәби уңышлары өчен Фәйзи Гомәров, Зәки Зәй­нуллин, Флүрә Сәлимова, Шәйхелислам Шәяхмәтов, Мариус Максютов, Шамил Рәхмәтуллин (актер осталыгы өчен дә), Рәфгать Рысаев, Хисаметдин Исмә­гый­лев, Зөлфия Гыйзетдинова һәм район тарихын өйрәнүдә зур хезмәтләре өчен Мәхмүт Мәхмүтов, Нәгыйм Ярмөхәммәтов, мәдәни һәм үзешчән сән­гатьне үстерүдәге хезмәт­ләре өчен Ракыя Сатучина, Әнисә Мөхәммәт­җанова, Анатолий Тарасов, Миңне­гөл Гайфуллина, Фирүзә Гарипова, Фәйзулла Фаткуллин) бу күркәм кичәләр­нең герое булып, Мифтахетдин Акмулла исе­мендәге премия лауреаты дигән мактаулы исемгә лаек булган. Шулай ук, Шәкәр авыл мәдәният йортының Люция Байназарова җитәкләгән “Күндерәк­кәй” башкорт халык фольклор ансамбле,”Эстәрле” татар халык театры һәм Казан шәһәренең Галиәс­гар Камал исемендәге татар дәүләт театры коллективы да бу исемне зур горурлык белән йөртә. Алар – фидакарь хезмәтләре һәм тормыш юллары белән дә борынгы Стәрлебашның данын арттырган, тирә-якка тараткан шәхесләр.

Быел исә Акмулла исе­мендәге премия фонды рәисе Ягъфәр Хисмәтуллин җитәкләгән комиссия бу мактаулы исемне Стәрле­баш­ның данын һәм аның сәләтле кешеләре­нең иҗа­ди җимешләрен, аларның маһирлыгын, осталыгын Татарстан, Русия генә түгел, “Халкым минем” тапшыруында бөтен дөнья киңлекләренә алып чыгып күрсәткән Ләйсәнә Садретдиновага тапшырырга карар итте. Бу карарны район хакимияте башлыгы Фәнүр Туктаров та хуплады. Шул рәвешле Стәр­лебаш-Казан бәйләнешен көннән-көн көчәйтә, ныгыта барган бүгенге кичә безне Стәрле­баш район Мәдә­ният са­раеның матур залына җыйды.

Ягымлы йөзле, йомшак тембрлы тавышлы, ихласлыгы күзләреннән балкыган телевидение алып баручысы булуы белән таныш, татар тормышын бөтен дөнья күләменә алып чыгучы журналист буларак билгеле Ләйсәнә Татар­стан­ның Азнакай районы Баланлы бүләк авылында туган. Күбесенчә картәнисе тәрбиясендә эшкә өйрәнеп үскән. Бала чагында кызчык телевидение турында уйламаган да. Рәсем төшерергә бик яраткан. 8нче сыйныфны тәмам­лагач, Лениногорск шәһә­ренә чыгып киткән һәм документларын музыка-художество училищесына тапшырып, укырга кереп кайткан. Рәсем, сызым укытучысы 1 ел Аксубайда, аннары Азнакай егетенә кияүгә чыгып, шунда эшен дәвам итә, анда 11 ел рәсем укытучысы булып эшли, соңыннан барлык булмышы белән милли мохиткә кереп китә.

Яраткан эшеннән рухи канәгатьлек алып, ир белән гаиләдә Искәндәр исемле улын тәрбияләп яшәп ятканда Ләйсәнәгә “Татар тапшыруларын иң яхшы алып баручы” бәйгесендә катнашырга тәкъдим ясыйлар. Ләйсәнә бәйгедә катнаша һәм җиңә! 2005 елдан Ләйсәнә Садретдинова без белгән “Халкым минем” тапшыруларын алып бара. Ул әлеге тапшыру проек­тының авторы да, мө­хәррире дә. Милләт­тәш­ләре яшәгән нинди генә илдә булмаган да, кайда гына сәфәр кылмаган дигән сорауга җа­вапны табу җиңелрәк булыр. Аның тынгысыз җаны һәрчак сәяхәткә чакыра, ул һәрчак юлда. Стәрлебаш белән дә кызыксынып, бу төбәк турында матур-матур тапшырулардан торган тоташ цикл әзерләп күрсәтте ул.

Ләйсәнә Садретдинованы бу мәртәбәле бүләк белән, аерым алганда, район хакимияте башлыгы урынбасары Альбина Суфиянова, премияне булдыручы Ягъфәр Хисмәтул­лин, профессор, тарихи фәннәр докторы Рәфис Зыязетдинов, элекке лауреатлар Зәки Зәйнуллин, Рәфгать Рысаев белән Хисаметдин Исмәгыйлев, район татар хатын-кыз­ларының “Ак калфак” оешмасы җитәкчесе Люция Дәүләтъярова котладылар. “Кызыл таң” гәзите, “Тулпар” журналы һәм “Әллүки” балалар басмасы исемен­нән лауреатны Дилбәр Булатова белән икебез тәбрикләдек, Стәрлебашта мәдәният һәм сәнгатьне үстерүгә өлеш керткән бер төркем шәхескә “Кызыл таң” гәзитенең Рәхмәт хатларын һәм истәлекле бүләкләр тапшырдык.

Әлбәттә, бүләкләнүчене үзешчән сәнгать артистлары да тәбрикләде. Театрлаштырылган тамашада Акмулланың үзен дә, Ләйсәнәнең бала чагын да күреп булды. Күркәм бәй­рәм сценариен Баш­корт­станның атказанган мәдә­ният хезмәткәре Зөлфия Гыйзетдинова әзерләгән иде, алып баручысы да ул булды.

Менә шундый матур вакыйга тарих битләреннән урын алды. Бу дөньяда күп нәрсәләр югала, җуела, тик Акмулла кебек үзе артыннан ак нур сызып калдырган затларның исемнәре мәңгегә халык йөрәгенә уелып кала.