Янгыннарда сабыйларны югалтмыйк!

Әйтик, 2016 елның язында Балтач, Шаран, Гафури һәм Бакалы районнарында дөрләгән дүрт янгында 12 баланың гомере өзелде. Гаиләләрнең барысы да социаль яктан имин булмаган.

Шушы фаҗигаләрдән соң республика Башлыгы Рөстәм Хәми­тов имин булмаган күпбалалы гаиләләр яшәгән урыннарны кыска гына вакыт эчендә янгыннан кисәтү приборлары белән җиһаз­ландыру бурычын куйган иде. 2016 елда бу максатларга бүлен­гән 1 миллион сумга 2700 автоном прибор сатып алынган.

Шул ук елның апрель-маенда, Гаилә, хезмәт һәм халыкны социаль яклау министрлыгы һәм урындагы үзидарә органнары мәгъ­лүмат­лары буенча, әлеге приборлар беренче чиратта куелырга тиешле гаиләләр исемлеге төзелгән. Анда имин булмаган күпбалалы 4830 гаилә кергән.

Җәен Нефтекама шәһәренең Әмҗә авылында төн­лә ут белән саксыз кылану нәтиҗәсендә ике фатирлы йортта янгын чыккач, әлеге прибор эшләп китә. Сигналны йортта яшәүчеләр ишетә һәм вакытында янгынны сүндерә.

Былтыр 20 июльдә Әб­җә­лил районының Красная Башкирия авылында шушы прибор ярдә­мендә янгында өч өлкән кеше һәм алты бала үлемнән йолып калына. “Кызыл әтәч” баш калкыту белән ул сигнал бирә һәм өйдә­геләрне уята.

2016 елда республикада барлыгы 4720 шундый прибор урнаш­тырыла, шуларның 2020се муниципалитетлар һәм иганәчеләр исәбенә сатып алына.

Ләкин фаҗигаләр дәвам итә. Былтыр августта Бөре районы­ның Үгез авылында чыккан янгында һәлак булган 9 кешенең 5е — балалар. Гаилә социаль яктан имин исәпләнгән. Шушы фа­җигадән соң Рөстәм Хәмитов янгыннан кисәтү приборларын аз тәэмин ителгән күпбалалы гаилә­ләр йортларына да кую турында күрсәтмә бирде. Шул ук елда бу максатларга 19,9 миллион сум акча бүленде һәм 36 мең гаиләнең йортына приборлар урнаштырылды.

Былтыр 31 октябрьдә республика Хөкүмәтенең “Янгын турында автоном кисәтүче приборлар бе­лән тәэмин итү рәвешендә граж­даннарның аерым ка­тегория-ләренә социаль ярдәм күрсәтү тәртибенә үзгәрешләр кертү турында” Карары кабул ителде. Ул шушы елның 1 гыйнварыннан бала туган гаиләләрне дә янгыннан кисәтү прибор­­лары белән тәэмин итәр­гә мөмкинлек бирде.

Бүгенге көнгә республикада 40 меңнән артык гаилә бала­ларының гомере һәм сәламәтлеге сагында янгыннан кисәтү приборлары тора. Аларны урнаштыру дәвам итәчәк. Бу эш балалар яшәгән һәр йорт һәм һәр фатир шушы прибор белән җиһазлан-дырылганнан соң гына тәмам­ланачак. Шул рәвешле, Башкортстан Башлыгы Рөстәм Хәмитов­ның вакытында һәм катгый чара күрүе нәтиҗәсендә, без балаларыбызны янгыннан саклап кала алачакбыз.

Шул да мәгълүм булсын: республикада “Балалы гаиләләргә — янгыннан кисәтү приборлары” хәйрия акциясе үтә. Аның барышында әлеге приборлар түләүсез урнаштырылачак гаиләләр катего­рияләре исемлеген киңәйтү планлаштырыла. Бу акциядә катнашу теләген тәүгеләрдән булып “Башспирт” предприятиесе белдерде. Ул бүлгән акчага Үгез авылы би-ләмәсенә кергән һәр торак пункт­та балалары булган һәр 76 гаилә автоном приборлар белән җиһаз­ландырылган.

Республиканың Гадәттән тыш хәлләр буенча дәүләт комитеты каршындагы Иҗтимагый совет теләүчеләрне әлеге эстафетага кушылырга чакыра. Катнашу тәртибе турында мәгълүматны Уфадагы “кайнар элемтә”нең 8(347) 244-15-75 телефоны буенча алырга мөмкин.

Әйткәндәй, “Сочи-2016” XV Халыкара инвестиция форумында Русия Федерациясе төбәкләрендә социаль-икътисади үсешнең иң яхшы тәҗрибәләре һәм башлангычлары Бөтенрусия конкурсында җиңүчеләр бүләкләнгән иде. “Яшәү өчен уңайлы шартлар тудыру” номинациясендә респуб­ликаның Гадәттән тыш хәлләр буенча дәүләт комитеты гамәлгә ашырган “Янгыннан кисәтү приборы — һәр йортка, һәр фатирга” проекты беренче урынны алды. Призерлар дип танылган проектлар арытаба Русия төбәклә­рендә һәм муниципалитетларында гамәлгә ашырылу өчен “Дөрес карарлар кибете” дигән иң яхшы тәҗрибәләр китап­ханәсенә кер­тел­гән.

Башкортстанның балалар яисә Бөек Ватан сугышы ветераннары яшәгән биналарда янгыннан кисәтү приборларын урнаштыру тәҗрибәсе быел Новгород өлкә­сендә гамәлгә ашырыла.