Стәрлебашлылар ничек Президент сайлады

7.59 сәгатьтә без 2817 санлы сайлау участогы урнашкан Айдарәле авыл мәдәният йортына бардык. Бу вакытта биредә кеше күп иде инде. Участок сайлау комиссиясеннән, күзәтүчеләрдән, полиция хезмәткәрләреннән һәм авыл биләмәсе хакимияте вәкилләреннән тыш, сайлаучылар да байтак иде.

Төп-төгәл 8.00 сәгать. Участок сайлау комиссиясе рәисе Гүзәлия Йосыпова сайлауның башлануы турында хәбәр итте һәм барлык катнашучыларны шушы күренекле вакыйга белән котлады. Хуҗалыкта берничә дистә ел эшләгән һәм өч бала тәрбияләп үстергән Фәймә һәм Дарвин Шәриповлар бюллетеньнәрен беренчеләрдән булып тартмага салды. Алар артыннан ук тагын унлап кеше үз тавышын бирде.

Сайлау участогы ачылганнан алып 12 минут эчендә монда 596 кешедән 20се тавыш бирде. Әйбәт башлангыч. Айдарәлеләр көн дәвамында да актив булгандыр дип ышанабыз.

Сайлаучылар арасында 93 яшьлек Гарифә әби Мусина (өстәге рәсемдә) игътибарны җәлеп итте. Ул монда ике килене – Рәзилә һәм Гөлнур озатуында килгән. Ул өстәл янына килеп, бюллетень алды. Бер минуттан аны тартмага китереп салды.

- Сайлау көнне кәефләрегез ничек, РФ Президентыннан нинди киләчәк көтәсез, - дип сорамый булдыра алмадым мин йөзьяшәр әбидән.

- Кызым, иң мөһиме, тынычлык булсын, - диде ул. – Илдә дә, районда да, бөтен Җир шарында да. Күңел тынычлыгы да кирәк. Ә калганы – була ул. Кәефем яхшы. Улым Хәйдәр һәм киленем Рәзилә белән яшим. Аллаһыма мең шөкер, зарланыр урын юк. Барысы да әйбәт. Киләчәктә дә һәркайда тотрыклылык һәм тынычлык булсын иде.

Бу участокта мөһим сәяси чарада беренче тапкыр катнашучылар сигез кеше теркәлгән иде. Алардан урындагы колледж курсантлары Сергей Савилов һәм Азат Шәехов иртән үк тәүгеләрдән булып тавыш биргән. Афәрин, егетләр!

Без тукталган киләсе пункт – 2818 санлы Тәтер-Арслан сайлау участогы. Безне күңелле музыка һәм хезмәтләрен үтәүче өч полиция хезмәткәре каршы алды. Тавыш бирү өчен тартмалар һәм участок сайлау комиссиясе әгъзалары барысы да авыл мәдәният йорты сәхнәсендә урнашканнар иде.

- Безнең участок – район үзәген исәпләмәгәндә, иң күпсанлыларның берсе, - ди участок сайлау комиссиясе рәисе Зөлфия Арсланова. – Тавыш бирүчеләр исемлегендә 712 кеше. Беренчеләрдән булып ветераннар – Вәсилә һәм Тимербулат Нафиковлар, Зөлфирә Үләева һәм Илдус Садыйков сайлады. Алар сайлау турында истәлеккә кечкенә генә бүләкләр алды.

Монда беренче тапкыр тавыш бирүчеләр дә байтак – 13 кеше булып чыкты. 30 яшькә кадәрге сайлаучылар – 90. Сайлау барышын сәяси партияләрнең вәкилләре, шулай ук республика, ә биш участокта – Русия Федерациясе Җәмәгать палатасы вәкилләре игътибар белән күзәтә. Бюллетеньнәр бирелүче өстәлләр артында – күп тапкырлар сайлауларда катнашкан участок сайлау комиссиясе әгъзалары. Болар үз эшләрен барлык нечкәлекләренә кадәр белгән һәм вазыйфаларын анык башкарган Мәүлияр Атласов, Фәридә Рысаева, Нурия Бакирова. Участок ачылганнан соң ярты сәгатьтә 15 кеше тавыш бирде. Алар арасында хезмәт ветераны, бер генә сайлауны да калдырмаган 80 яшьлек Нәзирә Мөхәммәтшина. Ул авыл мәдәният йортына якын яши. Үткән еллардагыча, ветеран үз тавышының мөһимлеген аңлап, кандидатларның иң лаеклысына тавыш бирергә килгән. Участок сайлау комиссиясе әгъзалары әйтүенчә, алар сайлаучыларның күпләп килүен 9.00-11.00 сәгатьләрдә һәм төштән соң көтә иде. Үткән елларда шулай булган.

Район үзәгенең 2 санлы урта мәктәбендә урнашкан 2838 санлы Мәктәп сайлау участогы быел монда, аэропортлардагы кебек, металлодетектор булуы белән аерылып тора. Аны тикшереп карау өчен без бер төргәк ачкыч тотып үттек. Әмма... ул аерым әйберләргә генә тәэсир итә һәм ачкычларга гына тавышы юк икән. Ягъни, ул “кычкырсын” өчен җитдирәк нәрсә кирәк. Аның “кычкырмавы” бик әйбәт. Сайлау ахырына кадәр ул тын торсын, сайлау тыныч үтсен, дип теләдек без участок сайлау комиссиясе әгъзаларына. Ул көнне аларның эше күп булды. Биредә 1189 кеше сайларга тиеш. Розалия һәм Фидаил Гыймрановлар беренчеләрдән булып килгән иде.

Кешеләрнең киләчәктә үзләре, балалары, оныклары өчен яхшы үзгәрешләргә ышаныч белдереп, сайлауга күтәренке кәеф, ачык йөз белән килүләре сөендерде. Оныгы Дания белән килгән Мәдинә Фаткуллина (астагы рәсемдә), оныклары Сабина һәм Диана белән килгән Гөлнур Йосыпова шундыйлардан. Сайлау турында истәлеккә кызларга участок сайлау комиссиясе әгъзалары “Без Президент сайладык” дип язылган төрле төстәге шарлар бүләк итте.

- Булачак Президентның зирәк булуын, гади кешеләрнең тормышын яхшыртучы законнар кабул итүен телибез. Хезмәт кешесенең эше һәм лаеклы хезмәт хакы, ә балалар һәм оныклар бәхетле булсын, - дип теләделәр алар бертавыштан, хушлашканда.